Adroddiad Blynyddol a Chyfrifon 2024-25

Mae Comisiwn y Senedd yn helpu i sicrhau llwyddiant hirdymor Senedd Cymru fel senedd gref, hygyrch, gynhwysol a blaengar—sy'n cyflawni'n effeithiol ar gyfer pobl Cymru.

Mae ein Hadroddiad Blynyddol a Chyfrifon yn nodi sut rydym wedi datblygu blaenoriaethau Comisiwn y Senedd o dan ein nodau strategol.

Ochr yn ochr ag uchafbwyntiau perfformiad a chyflawniadau, mae'r adroddiad yn cynnig adolygiad o'r flwyddyn: sut y gwnaed penderfyniadau, sut y defnyddiwyd adnoddau, a sut y cawsom ein dwyn i gyfrif.

 Mae'r cyfrifon—a gynhyrchwyd yn unol â chanllawiau Trysorlys EM ac a ardystiwyd gan Archwilydd Cyffredinol Cymru—yn rhan sylweddol o'r adroddiad.

Dros y flwyddyn ddiwethaf, mae'r Comisiwn wedi gweithio’n gyflymach nag erioed o’r blaen i sicrhau bod yr holl baratoadau angenrheidiol ar waith i groesawu 96 o Aelodau o'r Senedd yn dilyn yr etholiad ym mis Mai.
Cwblhawyd y prosiect uchelgeisiol a heriol i ehangu’r Siambr ar amser, sy'n golygu bod gan yr Aelodau bellach ofod addas at y diben sydd wedi'i gynllunio i sefyll prawf amser.

—
Y Gwir Anrhydeddus Elin Jones AS
Y Llywydd, Senedd Cymru

Darllenwch y rhagair

Yn ystod y flwyddyn ddiwethaf, bu’r Comisiwn yn cefnogi’r Senedd drwy flwyddyn brysur o ddeddfwriaeth ac ymgysylltiad, gan gynnal safonau uchel o reolaeth ariannol a llywodraethu ac, ar ben hynny, wynebu'r her o baratoi ar gyfer newid mawr.

—
Manon Bonner
Prif Weithredwr a Chlerc y Senedd

Darllenwch y cyflwyniad

Rydym yn ymdrechu i ddarparu cymorth seneddol o’r radd flaenaf, cadw dinasyddion wrth wraidd popeth a wnawn a defnyddio adnoddau'n gynaliadwy.

Mae etholiad eleni yng Nghymru yn gweld un o'r newidiadau mwyaf ers i'r Cynulliad Cenedlaethol ddod i fodolaeth ym 1999, wrth i'r Senedd gynyddu o 60 i 96 o Aelodau.

Darganfyddwch fwy am ein cyflawniadau eleni a sut rydym yn paratoi ar gyfer y Seithfed Senedd.

Darllenwch fwy am yr hyn rydym ni wedi bod yn ei wneud eleni

Mae ein fframwaith llywodraethiant yn nodi sut mae Comisiwn y Senedd yn cael ei lywodraethu a'i reoli—a sut y mae’n atebol am ei weithredoedd.

Mae ein hadroddiad diweddaraf yn dangos sut y mae’r fframwaith hwn wedi cefnogi’r gwaith o gyflawni amcanion strategol y Comisiwn dros y deuddeg mis diwethaf.

Darllenwch yr adroddiad llawn i gael rhagor o wybodaeth

Mae ein cyllideb yn cwmpasu costau rhedeg y Senedd, yn ogystal â chostau sy'n gysylltiedig ag Aelodau o’r Senedd—a bennir yn annibynnol gan y Bwrdd Taliadau.

Mae'r Adroddiad Blynyddol yn amlinellu ein perfformiad ariannol a gweithredol dros y flwyddyn.

Darllenwch y datganiadau ariannol

Rydym yn anelu at fod yn sefydliad cynhwysol ac enghreifftiol i'n staff, Aelodau o’r Senedd, a'r cyhoedd a wasanaethwn.

Mae ein Hadroddiad Blynyddol 2025-2026 ar Amrywiaeth a Chynhwysiant yn cynnwys gwybodaeth fanwl am y gwaith y mae Comisiwn y Senedd wedi'i wneud i ddathlu amrywiaeth a hyrwyddo cynhwysiant fel senedd ac fel cyflogwr.

Darllenwch fwy am sut rydyn ni'n creu amgylchedd cynhwysol

Bob blwyddyn, rydym yn casglu, yn dadansoddi ac yn cyhoeddi data amrywiaeth ar broffil ein gweithlu, gweithgarwch recriwtio a chyflog staff.

Mae'r fewnwelediad hwn yn llunio ein dull o recriwtio a chyflogaeth gynhwysol—gan ein helpu i ddiwallu anghenion amrywiol ein staff, ac adeiladu gweithlu sy'n adlewyrchu'r cyhoedd a wasanaethwn.

Darllenwch ein hadroddiad ar y gweithlu yn llawn

Mae ein hymrwymiad i ddarparu gwasanaethau dwyieithog o'r radd flaenaf yn parhau i fod yn gryf.

Rydym, hefyd, yn canolbwyntio ar feithrin sgiliau iaith a hyder ar bob lefel o'r sefydliad.

Ac rydym yn agored ynghylch y cynnydd rydym yn ei wneud, fel y gallwch ddilyn ein taith.

Darllenwch am ein hymrwymiad i weithio'n ddwyieithog

Rydym yn gweithio i wneud gweithrediadau'r Senedd yn garbon niwtral erbyn 2030—sy’n rhan o'n hymrwymiad ehangach i gynaliadwyedd.

Mae ein hadroddiadau ar ddata carbon Cwmpas 3 wedi gwella eleni. Rydym wedi gweithio gyda chyflenwyr a thimau caffael i sicrhau bod y wybodaeth hon yn fwy cynhwysfawr ac yn fwy cywir.

Darllenwch fwy am sut rydym yn lleihau ein heffaith amgylcheddol